بسم رب الحیدر




قربان اولوم جلالتيوه يا ابا الحسن
چوخ شائقم زيارتيوه يا ابا الحسن
مين بير آديله آدلانوب ا... لايَنام
اسم رضادي مظهري بو آدلاري تمام
اي اسمي اسم اعظم حق، اي شه اَنام
عاجزدي عقل مدحتيوه يا ابا الحسن
دنيانين اهلي رسميدي يوخ شبهه و مقال
شيرين آدي گَلنده عسلدن وورار مثال
شيرين دور اهل عشقه عَسَلدن ولي وصال
قربان اولوم حضرتيوه يا ابا الحسن
تلخين مثاليني عُقلا زهريدن وورار
عُشّاق ايچينده عکسينه امّا عقيده وار
مين دفعه زهريدن آجيراقدور فراق يار
يوخ منده تاب فرقتيوه يا ابا الحسن
آگاهيسن اوزون سن اَيا شاهِ ذوالکرم
من عاشقم سنه، ديمه مدّاح و نوکرم
بير آستانون اوپماقي مين خُلده ويرمرم
آند اولسون اوز امامتيوه يا ابا الحسن
بيگانه بُلمز عشق غمين، آشنا بُلر
گيزلين رموزي عالم جهر و خفا بُلر
قلبيم نجه يانور بير اوزون بير خدا بُلر
دل تشنه دور سقايتيوه يا ابا الحسن
سن مظهر جمال خداي عطوف سن
کَشّافِ هَمّ و غمّ و کُروب و لهوف سن
معروف سن بو اسمه امام رئوف سن
جانلار فدا عطوفتيوه يا ابا الحسن
چوخدان دوشوبدي خسته گوگل اشتياقيوه
ياندورما بير بيله مني نارِ فراقيوه
ايسته گَلوم بهشتيدن اعلي رواقيوه
ويرّم قسم رضايتيوه يا ابا الحسن
اي شاه مُلکِ سِلم و رِضا، اَيُّهَا الرِّضا
نوميد اولا گداي درون اولماسان رضا
باخ گور روادي اي شه اقليمِ اِرتِضي
من گَلميوم زيارتيوه يا ابا الحسن؟
سن شاه ماسِوا، سنه من کمترين گدا
شاهه گداني بوش يولا سالماق دگُل روا
بير باخماقون ايدر ايکي دنيامه اکتفا
اولّام رَهين منّتيوه يا ابا الحسن
قبروندن اوتري گوگلوم اَسور مثل برگ بيد
بير سائلم قاپوندا سيه روي و مو سفيد
ويرّم قسم جوان بالاوا ايتمه نااميد
قيل مفتخر عنايتيوه يا ابا الحسن
هجرونه گوز ياشيم قاريشوب قلب قانينه
رحم ايله بو بلا کشين آه و فغانينه
ويرّم قسم شَها سني معصومه جانينه
ايسته گَلوم زيارتيوه يا ابا الحسن
اي جود و بخشش و کرم و فضل معدني
اوغلون جواد جانينه ويرّم قسم سني
بيرده قوناق چاقور او گوزل قبريوه مني
مشمول قيل کرامتيوه يا ابا الحسن
دلدن آلوبدي طاقتيمي درد فرقتون
نيلوم نصيب اولموري فيض زيارتون
هر صبح و شام ياد ايدرم حال غربتون
يانّام ملال غربتيوه يا ابا الحسن
فرياد و داد او وقتيدن اي خسرو حجاز
مسموم ايلدي سني مامون حيله ساز
بو فکريله که ايليه بير نوع سِترِ راز
گَلدي سنون عيادتيوه يا ابا الحسن
گوز ياشلي عرض ايدردي که اي شاه محتشم
بو بَس دگُل فراقون اولور مايه ي اَلَم
طوس اهلي ايلوري مني بو امره متّهم
مه عاملم شهادتيوه يا ابا الحسن
مامون اگرچه قاتليدي اي شه کِبار
امّا حياليدور گنه اول شوم کين شعار
اوز ايتديقي خطاسينه ايلردي اعتذار
آغلاردي حال رحلتيوه يا ابا الحسن
امّا نه بي مروّتيميش شمر بيحيا
جدّون حسينين ايتدي بدندن باشين جدا
ووردي باشين جدايه همان غملي ماجرا
اولدي سبب مصيبتيوه يا ابا الحسن
من نوکرم قاپوزدا، حسيني دي شهرتيم
لايق دگُل اگرچه بو درباره خدمتيم
امّا بو بوش اَليله گنه يوخدي وحشتيم
گوز تيکميشم شفاعتيوه يا ابا الحسن
جدّون اوزي بيله بويوروبدي مفضّله
قرآندي اصل مدرکي، روشندي مسئله
واللهي قبريدن دوراجاقدي گُله گُله
قائل اولان ولايتيوه يا ابا الحسن


یا امام رضا